२०८२ भदौ १६

झापाका विश्वदीप बेश्रा सन्थाल समुदायबाट पहिलो जिल्ला न्यायाधीश बनेका छन्। न्याय परिषद्ले उनलाई सहित ६ जनालाई जिल्ला न्यायाधीशमा सिफारिस गरेको थियो। ४० वर्षीय बेश्रा यसअघि समुदायकै पहिलो शाखा अधिकृत र उपसचिव बनेका थिए।

सन्थाल समुदाय आर्थिक, सामाजिक र राजनीतिक रूपमा पिछडिएको छ। २०७८ को जनगणनाअनुसार नेपालमा सन्थालको संख्या ५७,३०१ हो। झापा र मोरङमा मुख्य रूपमा बसोबास गर्ने यस समुदायको बहुसंख्यक कृषि मजदुरीमा आश्रित छ।

बेश्राका परिवार ३ प्रतिशत भूमिधनीमा पर्छन् र उनका बुबा सरकारी शिक्षक थिए। कानुन पढेर आफ्नो समुदायको न्यायका लागि लड्ने लक्ष्यका साथ उनी वकिल बने र सरकारी सेवामा शाखा अधिकृत, उपसचिव हुँदै जिल्ला न्यायाधीशमा पुगे।

विश्वदीपले आफ्नो प्राथमिकता स्वच्छ, निष्पक्ष र पारदर्शी न्याय सम्पादन रहेको बताएका छन्। न्याय परिषदका सचिव अशोककुमार क्षेत्रीले बेश्राको नियुक्ति सबै मुलुकबासीका लागि प्रेरणादायी भएको बताए।