काठमाडौँ — राप्रपाका वरिष्ठ उपाध्यक्ष रविन्द्र मिश्रलाई सर्वोच्च अदालतले हाजिरी जमानीमा रिहा गर्न आदेश दिएको छ। न्यायाधीशद्वय कुमार चुडाल र तिलप्रसाद श्रेष्ठको संयुक्त इजलासले मिश्रलाई आवश्यक परेको खण्डमा फेरि उपस्थित गराउने शर्तसहित रिहा गर्न निर्देशन दिएको हो।

सर्वोच्चले मिश्रमाथिको मुद्दा अघि बढाउने अवस्था आउन सक्ने सम्भावना रहँदा पनि तत्कालका लागि कानुनी अभिभावकको जिम्मा तय गर्दै थुनामुक्त गर्न आदेश दिएको हो। यसअघि, न्यायाधीश सुनिलकुमार पोखरेलको इजलासले उनलाई पक्राउ गर्नुको कारण देखाउन र बन्दी उपस्थित गराउन आदेश दिएको थियो।

गत चैत १५ गते काठमाडौंको तीनकुनेमा राजावादी समूहले आयोजना गरेको प्रदर्शन हिंसात्मक बनेपछि मिश्रसहितका केही व्यक्तिहरूलाई प्रहरीले पक्राउ गरेको थियो। त्यस घटनामा संलग्न रहेको आशंकामा प्रहरीले मिश्रमाथि विभिन्न अभियोगमा अनुसन्धान गरिरहेको जनाएको छ। उनीहरूमाथि मंगलबार आठौँपटक ५ दिनको म्याद थप गरिएको थियो।

मिश्रलाई गैरकानुनी रूपमा थुनामा राखिएको दाबी गर्दै उनकी पत्नी सारिका कार्कीले वैशाख ३० गते सर्वोच्च अदालतमा बन्दीप्रत्यक्षीकरणको रिट दायर गरेकी थिइन्।