नवलपरासी — नवलपरासी पश्चिममा समुदाय स्तरमै पारिवारिक स्वास्थ्य प्रोफाइल बनाउने अभियान सुरु गरिएको छ । मोबाईल प्रविधिमार्फत नागरिकलाई स्वास्थ्यसम्बन्धी जानकारी उपलब्ध गराउने लक्ष्यका साथ लुम्बिनी प्रदेशको यो चौथो जिल्लामा अभियान अघि बढाइएको हो ।

यसअघि पाल्पा, बाँके र अर्घाखाँचीमा अभियान सुरु भइसकेको छ । नवलपरासीमा आयोजित कार्यक्रमलाई स्वास्थ्य मन्त्री खेम बहादुर सारुले उद्घाटन गर्दै मातृमृत्युदर घटाउन र सामाजिक–सांस्कृतिक पक्षलाई बुझेर तथ्याङ्कका आधारमा योजना बनाउनुपर्नेमा जोड दिए । उनका अनुसार समस्या आएपछि मात्र उपचार गर्ने नभई समस्याको सम्भावना पहिल्यै पहिचान गरेर रोकथामतर्फ ध्यान दिनुपर्नेछ ।

मन्त्री सारुले अस्पतालका कर्मचारीले निजी व्यवसायमा बोर्ड राख्ने कार्य हटाइएको, सवारीसाधनमा जीपीएस जडान गरिएको र छात्रवृत्ति करार विद्यार्थीलाई ग्रामीण क्षेत्रमा पठाउनेलगायतका काम मन्त्रालयले प्राथमिकतामा राखेको जानकारी दिए ।

स्वास्थ्य निर्देशनालयका तथ्याङ्क अधिकृत मान बहादुर ओलीले संविधानले सुनिश्चित गरेको स्वच्छ जीवनको हकलाई कार्यान्वयन गर्न स्वास्थ्य संस्था सक्रिय हुनुपर्ने बताए । उनका अनुसार जनस्वास्थ्य ऐन २०७५ र नियमावली २०७७ अनुसार स्वास्थ्य संस्थाले ९ शीर्षकअन्तर्गत ४५ भन्दा बढी सेवा उपलब्ध गराउनुपर्नेछ ।

तथ्याङ्कअनुसार नवलपरासी पश्चिममा १८–२० वर्ष उमेरमा हुने विवाह दर ३६ प्रतिशत छ । यहाँका ८६ प्रतिशत गर्भवतीले कम्तीमा चार पटक गर्भ परीक्षण गराएका छन् भने प्रदेश स्तरमा ९३ प्रतिशत आमा स्वास्थ्य संस्थामै सुत्केरी हुने गरेका छन् ।

स्थानीय तहका प्रतिनिधिहरुले पनि अभियानबारे आफ्नो धारणा राखेका छन् ।

• बर्दघाट नगरप्रमुख शम्भुलाल श्रेष्ठ : प्रोफाइल निर्माणपछि नागरिकलाई सहज तरिकाले सेवा मिल्ने।

• प्रतापपुर गाउँपालिका अध्यक्ष उमेश चौधरी : प्रदेश सरकारले स्वास्थ्यलाई डिजिटलीकरणतर्फ लग्नु सकारात्मक।

• रामग्राम नगरपालिकाकी उपप्रमुख सम्झना चौधरी : योजना राम्रो भए पनि कार्यान्वयन पक्षमा ध्यान दिनु आवश्यक।

यसैगरी, प्रदेश स्वास्थ्य मन्त्रालयकी सचिव दुर्गालक्ष्मी श्रेष्ठले प्रविधिमार्फत महिलाको स्वास्थ्यलाई गतिशील बनाउने उद्देश्यले योजना अघि सारिएको बताइन् । उनका अनुसार स्वास्थ्यकर्मी तथा स्वयंसेविकाले घरघरमै पुगेर डाटा संकलन गर्ने भएकाले भविष्यमा कार्यक्रम र योजना अझ प्रभावकारी हुनेछन् ।