आश्विन २६, २०८२

दमक — ‘जेनजी आन्दोलन’का क्रममा नेपाल प्रहरीको हतियार लुट्ने घटनामा संलग्न समूहका एक सदस्यसहित आठ जना झापाबाट पक्राउ परेका छन् । उनीहरू लागुऔषध खैरो हिरोइन (ब्राउन सुगर) सहित नियन्त्रणमा लिइएका हुन् ।

इलाका प्रहरी कार्यालय दमकका अनुसार पक्राउ पर्नेहरूलाई दमक नगरपालिका–३ स्थित भुटानी शरणार्थी शिविर सेक्टर–१ को एक छाप्रोबाट शनिबार साँझ पक्राउ गरिएको हो । लागुऔषध बिक्री भइरहेको भन्ने सूचनाको आधारमा खटिएको प्रहरी टोलीले खानतलासी गर्दा करिब ७ ग्राम ८ सय मिलिग्राम ब्राउन सुगर बरामद गरेको जनाएको छ ।

पक्राउ पर्नेमा आदित्य लिम्बू ‘जेनजी आन्दोलन’का क्रममा इलाका प्रहरी कार्यालय दमकबाट प्रहरीको हतियार लुट्ने घटनामा संलग्न भएको अभियोग छ । त्यस्तै, मोरङ मिक्लाजुङ–८ का निश्चल पोर्तेल गत भदौ २४ गते उर्लाबारी प्रहरी हिरासतबाट फरार भएका थिए ।

अन्य पक्राउ पर्नेमा साजन थापा, दीपेश तामाङ, सनम राई, पविन विश्वकर्मा, सुचन दर्जी र विजय माझी रहेका छन् ।

प्रहरीले पक्राउ परेकाहरूमाथि लागुऔषध सम्बन्धी मुद्दा दर्ता गरी थप अनुसन्धान अघि बढाएको जनाएको छ ।