प्रख्यात पाकिस्तानी पर्वतारोही साजिद अली सादपाराले विश्वको सातौं अग्लो हिमाल धौलागिरी (८,१६७ मिटर) अक्सिजन र भरियाको सहायता बिना सफलतापूर्वक आरोहण गरेका छन्।

गत मे ४ मा चार पाकिस्तानी पर्वतारोहीको टोलीले नेपालस्थित धौलागिरी हिमालको आरोहण सुरु गरेका थिए। सादपारा मे ७ मा आधार शिविर (बेस क्याम्प) पुगेपछि acclimatization प्रक्रिया स्वरूप क्याम्प ३ सम्म पुगेका थिए र पुनः आधार शिविरमा फर्किएका थिए।

पाकिस्तानको अल्पाइन क्लबका अनुसार, यो सादपाराको ८,००० मिटरभन्दा अग्ला हिमालमा नवौं सफल आरोहण हो, ती सबै बिना बोतलबन्द अक्सिजन सम्पन्न भएका हुन्।

“साजिद, के२ को जाडो आरोहणका क्रममा सन् २०२१ मा ज्यान गुमाएका प्रसिद्ध पर्वतारोही मुहम्मद अली सादपाराका छोरा हुन्। बुबाको विरासतलाई सम्मानपूर्वक अगाडि बढाउँदै उनले पाकिस्तानी पर्वतारोहण शक्ति र विश्वव्यापी उत्कृष्टताको प्रतीकका रूपमा आफूलाई उभ्याएका छन्,” क्लबले विज्ञप्तिमा उल्लेख गरेको छ।

क्लबका सचिव करार हैदरीले सादपारालाई बधाई दिँदै भने, “उहाँले विश्व मञ्चमा पाकिस्तानी पर्वतारोहीहरूको साहस र क्षमताको ऐतिहासिक पहिचान स्थापित गर्नुभएको छ। यो पाकिस्तान र सम्पूर्ण पर्वतारोहण समुदायका लागि गर्वको क्षण हो।”

काठमाडौंस्थित सेभेन समिट ट्रेक्सले एक विज्ञप्तिमार्फत सादपारा शनिबार बिहान ९:३५ बजे धौलागिरीको चुचुरोमा पुगेको पुष्टि गरेको छ। कम्पनीका अनुसार, वसन्त २०२५ को सिजनमा धौलागिरी शिखरमा पुग्ने उनी पहिलो आरोही हुन्।

सादपाराको टोलीले शुक्रबार साँझ ६:१५ बजे क्याम्प ४ बाट शिखर प्रयत्न सुरु गरेको थियो। आरोहणको क्रममा अन्तिम खण्डमा ३५० मिटरभन्दा बढी डोरी फिक्स गर्दै रुट सुरक्षित बनाइएको थियो।

साजिद सादपाराको धौलागिरी अभियान सेभेन समिट ट्रेक्स नेपाल र साब्रोसो पाकिस्तानको प्राविधिक सहयोगमा, कैलास कम्पनीको प्रायोजनमा सम्पन्न भएको थियो।