काठमाडौँ — पूर्वराजा ज्ञानेन्द्र शाहले हालै राजधानीमा प्रमुख राजावादी नेताहरूसँग गोप्य भेट गरेका छन्। राजसंस्थाको पुनर्स्थापनाको पक्षमा खुलेर उत्रिएको नवराज सुवेदी नेतृत्वको समूहले जेठ १५ गतेदेखि अनिश्चितकालीन आन्दोलनको घोषणा गरिसकेको छ। यही सन्दर्भमा बिहीबार शाहले सुवेदीसहित अन्य केही प्रभावशाली नेताहरूसँग भेटवार्ता गरेका हुन्।

सूत्रका अनुसार भेट राजधानीको एक होटलमा सम्पन्न भएको हो। सो अवसरमा राप्रपा नेपालका अध्यक्ष कमल थापा, राप्रपाका अध्यक्ष राजेन्द्र लिङ्देन र वरिष्ठ राजावादी नेता केशरबहादुर विष्ट पनि उपस्थित थिए। यद्यपि, सो भेटमा के-के छलफल भयो भन्ने विषयमा कुनै औपचारिक जानकारी सार्वजनिक गरिएको छैन।

निकट स्रोतका अनुसार, पूर्वराजा स्वयंले भेटको विषयवस्तु गोप्य राख्न आग्रह गरेका कारण सहभागी नेताहरुले पनि सञ्चार माध्यमसँग खुल्न चाहेका छैनन्। राप्रपा अध्यक्ष लिङ्देन र राप्रपा नेपाल अध्यक्ष थापालाई सम्पर्क प्रयास गरिए पनि उनीहरूसँग प्रत्यक्ष प्रतिक्रिया प्राप्त हुन सकेन।

यस गोप्य भेटलाई राजसंस्थाको सशक्तिकरणका निम्ति रणनीतिक समन्वयका रूपमा हेरिएको छ। निकट भविष्यमा राजावादी शक्तिहरूको आन्दोलन तीव्र हुने अनुमानसँगै पूर्वराजाको यस्ता भेटघाटले राजनीतिक वृत्तमा नयाँ तरंग ल्याएको छ।