भदौ १५,२०८३
बुटवल टाइम्स

काठमाडौं । रसुवाको भोटेकोशीमा आएको बाढीपछि हालसम्म विभिन्न जिल्लामा ९०३ जनाको शव फेला परेको छ भने ४ हजार २४७ जना सम्पर्कविहीन रहेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ।
प्राधिकरणका अनुसार सोमबार बिहान ९ बजेसम्म चितवनमा सबैभन्दा धेरै २७२ शव फेला परेका छन्। नवलपरासी पूर्वमा २०७, नवलपरासी पश्चिममा १५१, नुवाकोटमा ९५, गोरखामा ६२, धादिङमा ५५, तनहुँमा ३७ र रसुवामा २४ शव फेला परेका छन्।
बाढीमा परी २६७ जना घाइते भएका छन्। तीमध्ये १५६ जना उपचारपछि घर फर्किएका छन्। प्रभावित क्षेत्रमा ६ वटा सर्जिकल मेडिकल टिम परिचालन गरिएको छ।
सम्पर्कविहीन हुनेमा नुवाकोटका १ हजार ५५८, जलविद्युत् आयोजनामा कार्यरत ९३३, रसुवाका ८६५ र मकवानपुरका ६५ जना छन्। यस्तै ५९२ जना विदेशी नागरिक र उनीहरूसँगै घुम्न गएका १२७ जना नेपाली पनि सम्पर्कविहीन रहेको प्राधिकरणले जनाएको छ।
बाढी प्रभावित क्षेत्रमा नेपाली सेना, नेपाल प्रहरी र सशस्त्र प्रहरीका २० हजार ८१९ सुरक्षाकर्मी उद्धार तथा राहतमा परिचालन भएका छन्। हालसम्म १० हजार ४५१ जनाको उद्धार गरिएको प्राधिकरणले जनाएको छ।