जेठ २५, २०८३

कल्पना घिमिरे

बुटवल – राष्ट्रिय स्वतन्त्र पार्टी (रास्वपा) रूपन्देहीको सभापतिमा महेन्द्रप्रसाद उपाध्याय निर्वाचित भएका छन्। प्रथम जिल्ला अधिवेशनअन्तर्गत आइतबार राति सार्वजनिक भएको मतपरिणामअनुसार उपाध्याय २९६ मत प्राप्त गर्दै सभापतिमा निर्वाचित भएका हुन्। उनका प्रतिस्पर्धी आशिष न्यौपानेले १४३ मत प्राप्त गरे।

उपसभापतिमा दुर्गाप्रसाद खनाल २३८ मतसहित विजयी भए। उनका प्रतिस्पर्धी रचना क्षेत्रीले १८९ मत प्राप्त गरिन्।

सचिवमा ज्ञानेन्द्र पाण्डे २३७ मतसहित निर्वाचित भए। उनका प्रतिस्पर्धी मोहनविक्रम जिसीले २०३ मत प्राप्त गरे।

यस्तै, सहसचिवमा बाबुराम अर्याल २७९ मतसहित विजयी भए। उनका प्रतिस्पर्धी प्रेमनारायण तिवारीले १४८ मत प्राप्त गरे।

सदस्यहरूमा शर्मिला आचार्य, अनिता पन्थी, रामनाथ हरिजन, प्रेम विश्वकर्मा, पवित्राकुमारी निषाद र जमुना सापकोटा निर्वाचित भएका छन्।

त्यसैगरी, क्षेत्रीय संयोजकतर्फ क्षेत्र नम्बर १ मा खडानन्द पौडेल, क्षेत्र नम्बर २ मा विष्णुप्रसाद पौडेल, क्षेत्र नम्बर ३ मा छविलाल शर्मा, क्षेत्र नम्बर ४ मा विश्वलाल शर्मा तथा क्षेत्र नम्बर ५ मा शेषकान्त गैरे निर्वाचित भएका छन्।

नवनिर्वाचित सभापति उपाध्यायले पार्टीलाई वडा तहदेखि नै थप सशक्त, व्यवस्थित र जनमुखी बनाउने प्रतिबद्धता व्यक्त गरेका छन्। उनले पार्टीको विधि, विधान, सिद्धान्त र मूल्य–मान्यताअनुसार संगठन विस्तार तथा सुदृढीकरणलाई प्राथमिकतामा राख्दै गुटबन्दीलाई निरुत्साहित गरी एकताबद्ध ढंगले पार्टी सञ्चालन गरिने बताए। उनले अन्य राजनीतिक दलबाट आएका सदस्य तथा कार्यकर्तालाई पनि विधानअनुसार समायोजन गर्दै साझा उद्देश्यका साथ अघि बढाइने उल्लेख गरे। साथै जनताका साझा मुद्दा, सञ्चार क्षेत्र तथा मिडियाकर्मीहरूले भोगिरहेका समस्या समाधानका लागि सरोकारवालासँग सहकार्य गर्दै आवश्यक पहल गरिने प्रतिबद्धता व्यक्त गरे। रूपन्देहीमा रास्वपालाई जनविश्वासको बलियो राजनीतिक शक्तिका रूपमा स्थापित गर्न सबै नेता, कार्यकर्ता, शुभेच्छुक तथा आम नागरिकको साथ र सहयोग आवश्यक रहेको उनको भनाइ छ।

प्रथम जिल्ला अधिवेशनको उद्घाटन तथा निर्वाचन कार्यक्रमका प्रमुख अतिथि देवराज पाठक रहेका थिए भने विशिष्ट अतिथिका रूपमा पुनम अग्रवाल सहभागी भएकी थिइन्। रूपन्देहीका २ , ३ र ४ नं निर्वाचन क्षेत्रका सांसदहरूकाे उपस्थित रहेकाे थियाे भने उक्त कार्यक्रममा केन्द्रीय सदस्य सन्तोष गिरी लगायत पार्टीका केन्द्रीय तथा जिल्ला तहका नेताहरूको सहभागी रहेको थियो। त्यसैगरी, गुल्मीका सांसद गाेविन्द पन्थी, सागर ढकाल तथा पाल्पाका सांसद माधव थापा सहित विभिन्न निर्वाचन क्षेत्रका सांसदहरूको पनि कार्यक्रममा उपस्थिति रहेको थियो भने अध्यक्ष र काेषाध्यक्षले राजनीतिक र आर्थिक प्रतिबेदन प्रस्तुत गरेका थिए ।