काठमाडौं । युक्रेनमाथि रुसले अहिलेसम्मकै ठूलो हवाई आक्रमण गरेपछि अमेरिकी राष्ट्रपति डोनाल्ड ट्रम्पले मस्कोप्रति असन्तुष्टि व्यक्त गरेका छन्। साथसाथै उनको प्रशासनले रुसी अर्थतन्त्रलाई अझै कमजोर बनाउन नयाँ चरणका कडा प्रतिबन्धहरू लागू गर्ने तयारी गरेको अलजजिराले उल्लेख गरेको छ।

आइतबार राति र आइतबार बिहान रुसले युक्रेनमाथि गरेको मिसाइल र ड्रोन आक्रमणलाई “मानवताको लागि भयानक बर्बादी” भन्दै ट्रम्पले तत्काल समाधान आवश्यक रहेको बताएका थिए। उनले प्रतिबन्धको दोस्रो चरणबारे विस्तृत विवरण नदिए पनि आफू तयार रहेको स्पष्ट गरेका छन्।

यसअघि अमेरिकी अर्थमन्त्री स्कट बेसेन्टले रुसी तेल खरिद गर्ने मुलुकहरूलाई लक्षित गरी थप प्रतिबन्ध लगाउने तयारी भइरहेको बताएका थिए। उनका अनुसार यस्ता कदमहरूले रुसी राष्ट्रपति भ्लादिमिर पुटिनलाई वार्तामा आउन बाध्य बनाउन सक्नेछ। उनले युरोपेली साझेदारहरू पनि दबाब बढाउन सहमत भएको बताएका थिए।

युक्रेनी अधिकारीहरूले जनाएअनुसार उक्त आक्रमणमा कम्तीमा चार जनाको मृत्यु भएको छ भने मन्त्रिपरिषद् भवनमा आगलागी भएको थियो। युक्रेनी वायु सेनाका अनुसार रुसी पक्षले एकै पटकमा ८१० ड्रोन र १३ मिसाइल प्रहार गरेको थियो—जसलाई युद्ध सुरु भएयताको सबैभन्दा ठूलो आक्रमण मानिएको छ।

भारतले रुसी तेल खरिद जारी राखेकै कारण गत महिना ट्रम्प प्रशासनले ५० प्रतिशत कर लगाएको थियो। युद्धलाई शीघ्र अन्त्य गर्ने वाचा गरेका ट्रम्पले रुसमाथि निरन्तर दबाब बढाउने चेतावनी दिँदै आएका छन्।

युक्रेनका राष्ट्रपति भ्लोदिमिर जेलेन्स्कीले पनि मस्कोसँग अझै व्यापार गरिरहेका मुलुकहरूमाथि प्रतिबन्ध लगाउने सम्भावनाको स्वागत गरेका छन्।

गत महिना ह्वाइट हाउस फर्किएपछि ट्रम्पले अलास्काको एन्कोरेजमा पुटिनसँग पहिलो प्रत्यक्ष भेट गरेका थिए। त्यसलगत्तै उनले जेलेन्स्की र युरोपेली नेताहरूलाई वाशिङटन डीसीमा संभावित सम्झौताबारे छलफलका लागि निम्त्याएका थिए।

तर कूटनीतिक पहल हुँदाहुँदै पनि युद्ध अन्त्यतर्फ ठोस प्रगति भएको छैन। मस्को र किभबीचका मुख्य मुद्दामा अझै ठूलो मतभेद छ, र रुसी आक्रमण निरन्तर जारी छ।