२१ जेठ, बुटवल
सुमन न्याैपाने,

इन्डियन प्रिमियर लिग (आईपीएल) को इतिहासमा जुन टोलीले वर्षौंदेखि उपाधिको सपना देखिरहेको थियो, त्यो अन्ततः मंगलबार साकार भयो। १८ वर्ष लामो यात्रा, तीन पटकको फाइनल पीडा र करोडौं समर्थकको भावनात्मक साथसाथी—यी सबै समेटेर रोयल च्यालेन्जर्स बेंगलुरुले आफ्नो पहिलो आईपीएल उपाधि जित्दै क्रिकेटको इतिहासमा एउटा नयाँ अध्याय कोर्‍यो।

आईपीएल २०२५ को फाइनलमा बेंगलुरुले पञ्जाब किङ्सलाई ६ रनले पराजित गर्दै त्यो ऐतिहासिक उपाधि आफ्नो पोल्टामा पार्‍यो। खेलको अन्तिम क्षणसम्म रोमाञ्चक रहेको भिडन्तमा आरसीबीको अनुभव, संयमता र समर्पण निर्णायक साबित भयो।

कोहलीको समर्पणले उपाधि पायो सार्थकता
विराट कोहली, जसले आफ्नो सम्पूर्ण आईपीएल करियर आरसीबीकै लागि समर्पित गरे, अन्ततः उपाधिको स्वाद चाख्न सफल भए। १८ वर्षअघि आरसीबीमा आबद्ध भएका कोहलीले २००९, २०११ र २०१६ मा उपाधि नजिक पुगेर पनि गुमाएका थिए। तर यो पटक, खेलमा ३५ बलमा बनाएको ४३ रन र कप्तान रजत पाटिदारसँगको सशक्त नेतृत्वले उपाधि उनीहरूको बन्यो।

खेलपछि कोहलीले भने, “मैले आरसीबीलाई मेरो आत्मा दिएको छु। यो उपाधि मेरो मात्र होइन, लाखौं समर्थकको सपना हो।”

‘ई साल कप नामदु’ अब यथार्थ बन्यो
वर्षौंदेखि आरसीबी समर्थकहरूले जप्दै आएको नारा ‘ई साल कप नामदे’ यति धेरै पटक मजाकको विषय बनिसकेको थियो कि धेरैले त्यसलाई गम्भीरताका साथ लिने बन्द गरिसकेका थिए। तर मंगलबार रात त्यो नारा इतिहास बन्यो—अब त्यो मजाक होइन, प्रमाणित सफलता हो।

कप्तान रजत पाटिदारले खेलपछि भने, “विराट कोहलीभन्दा बढी यो उपाधि डिजर्भ गर्ने अरु कोही छैन।”

शशांकको प्रयास व्यर्थ, क्रुणाल र जोशको योगदान निर्णायक
पञ्जाबका ब्याटर शशांक सिंहले ३० बलमा ६१ रनको अविजित पारी खेलेर खेललाई अन्तिम ओभरसम्म रोमाञ्चक बनाए। तर जोश हेजलवूड र क्रुणाल पाण्ड्याको अनुशासित बलिङका कारण आरसीबीले जित सुरक्षित गर्‍यो।

क्रुणालले दुई महत्त्वपूर्ण विकेट लिए—प्रभसिमरन र सेट ब्याटर जोश इङ्लिस—जसले पञ्जाबको मिडल अर्डर धराशायी बनायो। अर्कातिर, जोशले अन्तिम ओभरसम्म दबाब कायम राखे।

सफलताको सूत्र : अनुभव र निरन्तरताको सँगम
यस सिजन आरसीबीको सफलतामा प्रशिक्षक एन्डी फ्लावरको रणनीति, अनुभवी खेलाडीहरूको संयोजन र युवा खेलाडीको आत्मविश्वास निर्णायक बने। जोश हेजलवूड, क्रुणाल पाण्ड्या, यश दयाल, भुवनेश्वर कुमार जस्ता अनुभवी खेलाडीहरूको भूमिका उल्लेखनीय रह्यो।

जर्सी नम्बर १८ र १८औं सिजनको जादू
संयोग यस्तो रह्यो कि कोहलीको जर्सी नम्बर १८ हो र यो सिजन आरसीबीको १८औं आईपीएल सिजन थियो। यही संयोगलाई धेरै समर्थकहरूले ‘कर्मको फल’ को रूपमा व्याख्या गरे।

खेल सकिएपछि कोहली घुँडा टेकेर मैदानमै रुन थालेको दृश्यले करोडौं क्रिकेटप्रेमीलाई भावुक बनायो। कोहलीका लागि यो उपाधि केवल ट्रफी थिएन, यो उनका १८ वर्षको निष्ठा र धैर्यताको उपज थियो।