काठमाडौं । राजसंस्थाको पुनर्स्थापना तथा हिन्दू राष्ट्र घोषणाका लागि ‘संयुक्त जनआन्दोलन’ नामक आन्दोलन भोलिदेखि सुरु हुँदैछ । आन्दोलनको तयारी अन्तिम चरणमा पुगेको बताउँदै आयोजक पक्षले २५ हजारभन्दा बढी समर्थकहरू राजधानीमा भित्रिसकेको दाबी गरेका छन् ।

यो आन्दोलन संयुक्त जनआन्दोलन समितिको संयोजनमा र *राष्ट्रिय प्रजातन्त्र पार्टी (राप्रपा)*को अगुवाइमा सञ्चालन हुन लागेको हो । राजसंस्थाका समर्थक विभिन्न घटक तथा दलहरूको सक्रिय सहभागीता रहने आयोजकले जनाएका छन् । उनीहरूको माग स्पष्ट छ — राजसंस्था र हिन्दू राष्ट्र पुनर्स्थापना, र वर्तमान संघीय शासन प्रणालीको खारेजी ।

राप्रपाका प्रवक्ता मोहन श्रेष्ठका अनुसार उपत्यका बाहिरबाट समर्थकहरूको आगमन निरन्तर भइरहेको छ । “अहिलेसम्म २५ हजारभन्दा बढी सहभागी आइसकेका छन्, भोलिसम्म यो संख्या अझै बढ्नेछ,” श्रेष्ठले भने । उनले आन्दोलन शान्तिपूर्ण हुने दाबी गर्दै सम्भावित मुठभेड टार्नका लागि विशेष सतर्कता अपनाइएको जानकारी दिए ।

उनका अनुसार आन्दोलनका क्रममा सुरक्षा र अनुशासन सुनिश्चित गर्न करिब १ हजार स्वयम्‌सेवक परिचालन गरिनेछ । “नेता तथा सर्वसाधारण सहभागीको सुरक्षा, र सम्भावित घुसपैठ रोक्नका लागि स्वयम्‌सेवकहरूलाई विशेष तालिम दिइएको छ,” श्रेष्ठले बताए । साथै, आन्दोलनमा कुनै पनि किसिमको हिंसात्मक गतिविधि हुन नदिइने उनको दाबी छ ।

यसै सन्दर्भमा आज काठमाडौंको एक बैंक्वेटमा स्वयम्‌सेवकहरूलाई प्रशिक्षण कार्यक्रम गरिएको छ । कार्यक्रममा संयुक्त जनआन्दोलन समितिका संयोजक नवराज सुवेदी, राप्रपा अध्यक्ष राजेन्द्र लिङ्देन, राप्रपा नेपाल अध्यक्ष कमल थापालगायतका नेताहरूले सम्बोधन गरेका थिए । उनीहरूले आन्दोलनलाई शान्तिपूर्ण, अनुशासित र मर्यादित बनाउने प्रतिबद्धता व्यक्त गरे ।

भोलिको आन्दोलनमा शीर्ष राजावादी नेताहरूको सहभागिता रहनेछ । यसअघि तीनकुनेमा भएको आन्दोलनमा प्रहरीको अश्रुग्यासको सामना गरेका नवराज सुवेदी पनि भोलिको कार्यक्रममा उपस्थित हुने जनाइएको छ ।

मुख्य बुँदाहरू: