अख्तियार दुरुपयोग अनुसन्धान आयोगले चितवनस्थित नेपाल नमूना माध्यमिक विद्यालयमा अवैध नियुक्ति र ओहदाको दुरुपयोग गरेको आरोपमा विद्यालय व्यवस्थापन समितिका तत्कालीन अध्यक्ष तिलकराज शर्मा पौडेलसहित ६ जनाविरुद्ध भ्रष्टाचारको मुद्दा दर्ता गरेको छ।

आयोगका अनुसार पौडेलसहित पाँच जनाले आफूमा नभएको अधिकार प्रयोग गरी नियुक्ति, समायोजन तथा सेवा सुविधा सम्बन्धी निर्णय गरेको पाइएपछि आइतबार विशेष अदालतमा भ्रष्टाचारको अभियोगसहित मुद्दा दर्ता गरिएको हो।

शिक्षक नियुक्तिमा स्वार्थपूर्ण निर्णय
मुद्दामा तिलकराज शर्मा पौडेलसँगै तत्कालीन समिति सदस्य लेखनाथ आचार्य, मेनुका लम्साल, शिक्षक दीपकचन्द्र शर्मा, प्रधानाध्यापक तथा सदस्य सचिव बुद्धिराज सुवेदी र शिक्षक विजया सुवेदी संलग्न छन्। विजया सुवेदी तिलकराज पौडेलकी छोरी तथा बुद्धिराज सुवेदीकी पत्नी रहेको खुलेको छ।

अख्तियारको अनुसन्धान अनुसार, विजया सुवेदीलाई २०५५ साल कात्तिक ८ गते करारमा नियुक्त गरिएको भए पनि, उनीलाई २०६३ माघ १३ गतेदेखि प्रावि/मावि तहको कक्षा संचालन गर्न दिने निर्णय गरिएको थियो। त्यस्तै, २०७२ पुस ४ गते उनलाई उच्च माविमा पुनः करारमा नियुक्त गरिएको थियो।

ओहदाको दुरुपयोग र विनियम निर्माण
२०७८ भदौ ७ गते बसेको विद्यालय समितिको बैठकमा उनीहरूले आफूमा कानुनी रूपमा नभएको अधिकार प्रयोग गर्दै “शिक्षक तथा कर्मचारी समायोजन एवं व्यवस्थापन विनियम” निर्माण गरेका थिए। उक्त विनियममार्फत विजया सुवेदीलाई तृतीय श्रेणी सरहको सेवा सुविधा उपलब्ध गराउने निर्णय भएको अनुसन्धानमा खुलेको छ।

त्यसअनुसार २०७८ साउन १ गतेदेखि लागू हुने गरी उनलाई स्थायी नियुक्त गरिएको र कर्मचारी सञ्चय कोषबाट समेत कट्टा हुने गरी व्यवस्था मिलाइएको थियो।

कानुनविपरीत नियुक्ति
शिक्षा, विज्ञान तथा प्रविधि मन्त्रालय अन्तर्गतको शिक्षा ऐन तथा नियमावलीअनुसार विद्यालय व्यवस्थापन समितिलाई विद्यालयको स्रोतबाट शिक्षक वा कर्मचारी नियुक्त गर्ने अधिकार छैन। यद्यपि, समितिले स्वेच्छाचारी निर्णय गर्दै नियुक्ति प्रक्रिया अघि बढाएको आयोगले जनाएको छ।

“नपाएको ओहदा पाएको भनी अधिकार दुरुपयोग गरेकाले उनीहरूमाथि भ्रष्टाचार निवारण ऐनअनुसार मुद्दा दायर गरिएको हो,” आयोगका प्रवक्ता राजेन्द्रकुमार पौडेलले जानकारी दिए।

अनुसन्धानका क्रममा विजया सुवेदीलाई प्रधानाध्यापक बुद्धिराज सुवेदीले नियुक्ति पत्र समेत प्रदान गरेको प्रमाण फेला परेको आयोगले जनाएको छ।