१ फागुन २०८२
काठमाडौं । बंगलादेशमा बिहीबार सम्पन्न प्रतिनिधिसभा निर्वाचनमा Bangladesh Nationalist Party (बीएनपी) ले स्पष्ट बहुमत हासिल गरेको छ। प्रारम्भिक परिणामअनुसार बीएनपी अध्यक्ष Tarique Rahman प्रधानमन्त्री बन्ने निश्चित भएको छ।
कुल ३०० सिटमध्ये २९९ सिटमा मतदान भएको थियो। एक क्षेत्रमा उम्मेदवारको मृत्यु भएपछि त्यहाँको मतदान स्थगित गरिएको निर्वाचन आयोगले जनाएको छ। हालसम्म सार्वजनिक २०६ सिटको मतगणनामा बीएनपीले १६५ सिट जितेको स्थानीय सञ्चारमाध्यमले जनाएका छन्।

रहमानले दुई निर्वाचन क्षेत्रबाट उम्मेदवारी दिएका थिए र दुवै स्थानमा विजयी भएका छन्। उनी पूर्वप्रधानमन्त्री Khaleda Zia का छोरा हुन्। लामो समय विदेश बसाइपछि उनी गत वर्ष स्वदेश फर्किएका थिए।

जमात–ए–इस्लामी नेतृत्वको ११ दलीय गठबन्धनले ४५ सिट जितेको छ भने अन्य दल र स्वतन्त्र उम्मेदवारले ३ सिटमा सफलता हासिल गरेका छन्।

करीब दुई दशकदेखि सत्ताबाहिर रहेको बीएनपीका लागि यो परिणामलाई शक्तिशाली पुनरागमनका रूपमा हेरिएको छ। मतदानपछि रहमानले कानुन–व्यवस्था सुदृढीकरण आफ्नो पहिलो प्राथमिकता हुने बताएका थिए।

यसैबीच, पूर्वप्रधानमन्त्री Sheikh Hasina ले निर्वाचनलाई ‘पूर्णरूपमा फर्जी र असंवैधानिक’ भन्दै अस्वीकार गरेकी छन्। उनको पार्टी Awami League लाई चुनावअघि प्रतिबन्ध लगाइएकाले निर्वाचनमा सहभागी हुन पाएको थिएन।

हसिनाले अन्तरिम सरकार प्रमुख Muhammad Yunus माथि गैरकानुनी रूपमा सत्ता कब्जा गरेर चुनाव गराएको आरोप लगाएकी छन्।

निर्वाचन परिणामसँगै बंगलादेशको राजनीतिक दिशा कता मोडिने भन्ने चासो बढेको छ।