फाल्गुन ७, २०८२

कल्पना घिमिरे

बुटवल  – राष्ट्रिय स्वतन्त्र पार्टीले  फागुन ९ गते शनिबार रुपन्देहीमा  ‘परिवर्तन उद्घोष सभा’ आयोजना गर्ने भएको छ। पार्टीले पत्रकार सम्मेलनमार्फत सभाबारे औपचारिक जानकारी दिएको हो।
पार्टीका केन्द्रीय सदस्य तथा मूल आयोजक समिति संयोजक सन्ताेष गिरिले सभा रुपन्देहीको भैरहवा, अञ्चलपुरस्थित प्रदर्शनी स्थलमा आयोजना हुने जानकारी दिए।
सभाका प्रमुख अतिथि तथा मुख्य वक्ताका रूपमा पार्टीका वरिष्ठ नेता बालेन शाह  र पार्टी सभापति रबि लामिछाने  रहने जनाइएको छ।
साविक लुम्बिनी अञ्चलअन्तर्गत राप्ती वारीका  ) पाल्पा, गुल्मी, नवलपरासी, कपिलवस्तु, अर्घाखाँची र रुपन्देही जिल्लाका प्रतिनिधिसभा प्रत्यक्षतर्फका उम्मेदवारहरूले समेत कार्यक्रममा सहभागिता जनाउनेछन्। प्रत्येक उम्मेदवारलाई आफ्नो धारणा राख्न ३ मिनेटको समय छुट्याइएको आयोजकले जनाएको छ।
कार्यक्रमको मुख्य आकर्षणका रूपमा ५ मिनेट ‘परिवर्तनको शंखनाद’ र ५ मिनेट ‘निरन्तर परिवर्तनको घण्टी’ बजाउने कार्यक्रम राखिएको छ। संयोजक गिरिले कार्यक्रममा सहभागी हुने नेता, कार्यकर्ता तथा शुभेच्छुकलाई साथमा एक – एक वटा घण्टी लिएर आउन आग्रह गरेका छन्।
जिल्लाअनुसार र्‍यालीको रुट पनि तय गरिएको छ।

लुम्बिनी प्रदेशका विभिन्न जिल्लाका भेषभूषा, भाषा, संस्कृतिको झल्को दिने झाँकीसहित प्रदर्शन गरिनेछ। कार्यक्रमबीच एक–दुई वटा सांगीतिक विश्रामसमेत राखिएको आयोजकले जनाएको छ।
कार्यक्रमलाई व्यवस्थित बनाउन जिल्ला प्रशासन कार्यालय, जिल्ला निर्वाचन कार्यालय र सिद्धार्थनगर नगरपालिकासँग समन्वय गरिएको जानकारी दिइएको छ।  ६ जिल्लाबाट नेता, कार्यकर्ता र शुभेच्छुकहरूको उल्लेख्य सहभागिता रहने अपेक्षा गरिएको छ।
यसैबीच पार्टीले पत्रकार सम्मेलन गरी सभाको तयारी तीव्र बनाइएको जनाएको छ।