पुस १७, २०८२

काठमाडौं। पोखराको बाटुलेचौरस्थित लिची बगानको जग्गा हिनामिनासम्बन्धी घूस लेनदेन प्रकरणमा अभियोग लागेका पूर्वमन्त्री राजकुमार गुप्तालाई विशेष अदालतले पुर्पक्षका लागि थुनामा पठाउने आदेश दिएको छ ।

न्यायाधीशहरू सुदर्शनदेव भट्ट, डिल्लीरत्न श्रेष्ठ र विदुर कोइरालाको इजलासले बुधबार गुप्तालाई थुनामा पठाउने आदेश गरेको हो । विशेष अदालतमा बिहान ११ बजे हाजिर भएका गुप्ताको दिनभर बयान भएको थियो ।

बयानका क्रममा गुप्ताले आफूमाथि लागेको आरोप झूटो भएको र कसैसँग घूस नलिएको दाबी गरेका थिए । तर अदालतले तत्काल उपलब्ध प्रमाणका आधारमा उनलाई निर्दोष मान्न नसकिने ठहर गर्दै पुर्पक्षका लागि थुनामा पठाउने आदेश दिएको हो ।

अदालतले गुप्तालाई थुनामा पठाउने प्रमुख आधारका रूपमा फोन संवादको अडियो रेकर्ड र त्यसको विधि विज्ञान प्रयोगशालाबाट प्राप्त परीक्षण प्रतिवेदनलाई मानेको छ । त्यसैगरी तत्कालीन प्रमुख मालपोत अधिकृत रामचन्द्र अधिकारी, पूर्वमन्त्री रञ्जिता श्रेष्ठ र बिचौलिया सुजनकुमार तामाङले गुप्तालाई पठाएका सन्देशहरूलाई पनि प्रमाणका रूपमा लिइएको छ ।

पोखराको बाटुलेचौरस्थित लिची बगानको जग्गा हडप्ने प्रपञ्चमा दुई पूर्वमन्त्री राजकुमार गुप्ता र रञ्जिता श्रेष्ठविरुद्ध अख्तियार दुरुपयोग अनुसन्धान आयोगले २३ असोजमा भ्रष्टाचार मुद्दा दायर गरेको थियो । सो मुद्दामा बिचौलिया सुजनकुमार तामाङसहित खेमबहादुर पुन, यामकुमारी गुरुङ र तुल्सीराम बुढामगरलाई पनि प्रतिवादी बनाइएको छ ।

एमाले नेता तथा पूर्वसामान्य प्रशासनमन्त्री गुप्ता र नागरिक उन्मुक्ति पार्टीकी अध्यक्ष एवं पूर्वभूमि व्यवस्था, सहकारी तथा गरिबी निवारणमन्त्री श्रेष्ठविरुद्ध जनही ७८ लाख रुपैयाँ बिगो मागदाबी गरिएको छ । पूर्वमन्त्री श्रेष्ठ भने हालसम्म अदालतमा हाजिर भएकी छैनन् ।

लिची बगानको १३४ रोपनी जग्गा हडप्ने योजनासहित घूसको डिल गरिएको अडियो गत असारमा सार्वजनिक भएको थियो । अडियो सार्वजनिक भएपछि केपी शर्मा ओली नेतृत्वको मन्त्रिपरिषद्मा रहेका गुप्ताले ३१ असारमा पदबाट राजीनामा दिएका थिए ।

पुस २०८१ मा घूस लेनदेन हुँदा भूमि व्यवस्था, सहकारी तथा गरिबी निवारणमन्त्रीमा एमाले नेता बलराम अधिकारी थिए । उनलाई पनि रकम बुझाइएको दाबी बिचौलिया तामाङले गरे पनि अधिकारीमाथि छुट्टै अनुसन्धान भइरहेको भन्दै यस मुद्दामा प्रतिवादी