२०८२ जेठ ८ गते

जनकपुरधाम । मधेश प्रदेश सरकारको मन्त्रिपरिषद् पुनर्गठनपश्चात जनमत पार्टीका नवनियुक्त मन्त्री बसन्त कुशवाहा र संजय यादवले पद तथा गोपनीयताको शपथग्रहण गरेका छन्।

जनकपुरधामस्थित मधेश भवनको मुख्यमन्त्री निवासमा आयोजित समारोहमा उद्योग, वाणिज्य तथा पर्यटन मन्त्रीको जिम्मेवारी पाएका कुशवाहा र वन तथा वातावरण मन्त्रालय सम्हाल्ने यादवलाई प्रदेश प्रमुख सुमित्रा देवी भण्डारीले शपथ गराएकी हुन्।

मुख्यमन्त्री सतिशकुमार सिंहले जनमत पार्टीका मन्त्रीहरूमा हेरफेर गर्दै मन्त्रिपरिषद् पुनर्गठन गरेका हुन्। यसअघि कुशवाहा र यादवको स्थानमा क्रमशः सकील अलि मिया उद्योग मन्त्री र त्रिभुवन साह वन मन्त्री थिए।

जनमत पार्टीले आन्तरिक प्रक्रिया अनुसार मन्त्री परिवर्तन गरिएको जनाएको छ। शपथग्रहणलगत्तै दुबै मन्त्रीले आ-आफ्नो मन्त्रालयमा पुगेर पदभार ग्रहण गरेका छन्।

सिरहाबाट प्रत्यक्ष निर्वाचित सांसद संजय यादव यसअघि कृषि राज्यमन्त्री रहेका थिए भने समानुपातिक सांसद बसन्त कुशवाहा कृषि मन्त्रीको जिम्मेवारी सम्हालिसकेका अनुभवी नेता हुन्।