बिहीबार, २५ वैशाख

काठमाडौँ — लघुवित्त पीडितहरू पुनः आन्दोलनमा उत्रिएका छन्। विगत १ महिना १० दिनदेखि आन्दोलनरत पीडितहरूले बिहीबार माइतीघर मण्डलामा प्रदर्शन गर्दै सरकारमाथि गरिएको सहमति कार्यान्वयन नगरेको आरोप लगाएका हुन्।

विभिन्न जिल्लाबाट राजधानी आएका पीडितहरूको नेतृत्व सहकारी बचतकर्ता संरक्षण राष्ट्रिय अभियान महासङ्घले गरिरहेको छ। उनीहरू चैतदेखि नै काठमाडौँमा छन्, जसको सुरुआत सरकार र लघुवित्त सङ्घर्ष समितिबीच भएको सहमति कार्यान्वयनको मागसहित गरिएको थियो।

गत चैतमा भएको सो सहमतिमा ऋणीहरूलाई साँवा, ब्याज, जरिवाना, कालोसूची तथा धितो फुकुवा गर्ने, पीडितहरूको पुनःस्थापना, तथा अपाङ्ग, दीर्घरोगी वा कर्जा भुक्तानी गर्न अक्षम व्यक्तिको कर्जा मिनाहा जस्ता विषय समेटिएका थिए।

त्यसका साथै सहमतिमा ६० दिनभित्र प्रतिवेदनसहित समाधानका उपायहरू प्रस्तुत गर्नेगरी एक कार्यदल गठन गर्ने भनिएको थियो, जसमा विज्ञहरू र आन्दोलनरत पक्षका तीन जना प्रतिनिधि रहने कुरा उल्लेख थियो। तर, समय बितिसक्दा पनि कार्यान्वयनमा चासो नदेखाइएको भन्दै आन्दोलनकारी आक्रोशित छन्। उनीहरूका अनुसार लघुवित्त संस्थाहरूले पुनः ऋणीहरूलाई धितो लिलामीको धम्की दिँदै दबाब सिर्जना गर्न थालेका छन्।