जेठ १४ गते

काठमाडौं — गृहमन्त्री रमेश लेखकले भिजिट भिसा प्रकरणमा आफूमाथि लागेका आरोपहरू पूर्णतः आधारहीन र षड्यन्त्रपूर्ण भएको दाबी गरेका छन्। बुधबार संसद् भवनमा आयोजित पत्रकार सम्मेलनमा बोल्दै उनले आफूलाई सहसचिव तीर्थराज भट्टराईसँग जोडेर गलत रूपमा मुछिएको बताएका हुन्।

“यस प्रकरणमा मेरो कुनै संलग्नता छैन,” मन्त्री लेखकले स्पष्ट पार्दै भने, “मेरो विरुद्ध नियोजित ढङ्गबाट आक्रमण गरिएको छ। यो सुनियोजित षड्यन्त्र हो।”

उनले अख्तियार दुरुपयोग अनुसन्धान आयोग (अख्तियार) बाट हुने अनुसन्धान वा कारबाहीलाई खुला मनले स्वागत गर्ने बताएका छन्। “आयोगको अनुसन्धानमा कुनै पनि पक्षबाट प्रभाव पारिनु हुँदैन,” उनले जोड दिए।