२७ साउन,

काठमाडौं — प्रहरी महानिरीक्षक (आईजीपी) दीपक थापा अबको २२ दिनपछि अनिवार्य अवकाशमा जान लागेका छन्। प्रहरी नियमावलीमा तोकिएको ३० वर्षे सेवा अवधिअनुसार उनी १८ भदौ राति १२ बजेबाट अवकाश हुनेछन्।

थापा अवकाशमा गएपछि ३२औं आईजीपीको प्रतिस्पर्धा खुल्नेछ, जसमा हाल एकल रूपमा चन्द्रकुवेर खापुङ अगाडि देखिएका छन्। खापुङ अहिले केन्द्रीय अनुसन्धान ब्यूरो (सीआईबी)का निर्देशकका रूपमा कार्यरत छन्। उनी र थापा दुवै १९ भदौ २०५१ मा इन्स्पेक्टर भर्नाको आवेदन दिएका थिए, तर नियुक्ति तीन लटमा भएको थियो।

तीन लटको रोचक संयोग
पहिलो लटमा नियुक्ति पाएका ५३ जनामध्ये बसन्तबहादुर कुँवर यसअघि नै आईजीपी भइसकेर ५ चैत २०८१ मा अवकाश गइसकेका छन्। दोस्रो लटबाट थापा आईजीपी बनेका हुन्। अब तेस्रो लटमा नियुक्त खापुङ एक्लै प्रतिस्पर्धामा छन्।
उनै ब्याचका लालमणि आचार्य र कृष्णहरि शर्मा पोखरेल एआईजीको ५६ वर्षे उमेर हदले क्रमशः जेठ १० र भदौ १५ मा अवकाश हुँदैछन्, जसले खापुङलाई थप सहज प्रतिस्पर्धी बनाएको छ।

दोस्रो सबैभन्दा छोटो कार्यकालको सम्भावना
यदि खापुङ आईजीपी बने भने उनी २ महिना ९ दिन मात्र नेतृत्वमा रहने सम्भावना छ, जसपछि २६ कात्तिकमा अवकाश हुनेछन्। यसरी उनी प्रहरी इतिहासकै दोस्रो सबैभन्दा छोटो कार्यकालका आईजीपी बन्न सक्छन्। यसअघि २०१२ सालमा तोरण शमशेर जबरा मात्र ३ दिनका लागि आईजीपी बनेका थिए।

इमानदार छवि र अनुभव
खापुङले डीआईजी हुँदा कोशी प्रदेशको कमान्ड सम्हालेका थिए र एसएसपी रहँदा काठमाडौं उपत्यका अपराध अनुसन्धान कार्यालयको जिम्मेवारी पाएका थिए। उनी इमानदार र विवादरहित प्रहरी अधिकृतको रूपमा चिनिन्छन्।

ऐन परिवर्तन भए पनि प्रतिस्पर्धामा
नयाँ प्रहरी ऐन आएर ३० वर्षे सेवा अवधि हटाए पनि खापुङको प्रतिस्पर्धा यथावत रहनेछ। उनी भन्छन्, “म आफूलाई लक्की मान्छु। विवादबाट टाढै रहेर काम गर्दै यो स्थानसम्म पुगेँ।”

अन्य सम्भावित प्रतिस्पर्धीहरू
हालका अन्य एआईजीहरू — सिद्धिविक्रम शाह, दानबहादुर कार्की, राजन अधिकारी र डा. मनोज केसी — पनि नियमावलीअनुसार आईजीपीको प्रतिस्पर्धामा छन्। नियमावली २०७१ को दफा ४१ ले एआईजीमध्येबाट ज्येष्ठता, कार्यकुशलता, नेतृत्व क्षमता आदिका आधारमा सरकारलाई उपयुक्त उम्मेदवार चयन गर्ने प्रावधान राखेको छ।