काठमाडौं — सत्तारूढ नेकपा एमालेको भ्रातृ संगठन युवा संघ नेपालको नयाँ नेतृत्व चयन सहमतिको बाटोबाट निस्किन नसकेपछि निर्वाचनमा जाने पक्का भएको छ। युवा संघको १०औं महाधिवेशनअन्तर्गत मंगलबार बिहान मतदान हुने पक्का भएको हो।

प्रधानमन्त्री तथा एमाले अध्यक्ष केपी शर्मा ओलीको निर्देशनअनुसार सहमतिमा नेतृत्व चयनको प्रयास भएको भए पनि अन्ततः सहमति जुट्न नसकेको युवा संघका इन्चार्ज राजीव पहारीले जनाए।

‘सर्वसम्मत ढंगबाट नेतृत्व चयनका लागि अधिकतम पहल गर्यौं,’ पहारीले भने, ‘तर सहमति सम्भव नभएपछि स्वच्छ निर्वाचनबाट नेतृत्व चयन गर्ने प्रक्रियामा गएका छौं।’

अध्यक्षका लागि थेबे र पुरीबीच प्रतिस्पर्धा

संघको अध्यक्ष पदका लागि दुई प्रभावशाली उम्मेदवार—अघिल्लो कार्यकालका अध्यक्ष क्षितिज थेबे र हालका उपाध्यक्ष सुमन पुरी—बीच प्रतिस्पर्धा हुँदैछ। दुवैले उम्मेदवारी फिर्ता लिन अस्वीकार गरेपछि पार्टी नेतृत्वले पनि निर्वाचन प्रक्रियालाई अनुमोदन गरेको हो।

इन्चार्ज पहारीका अनुसार अध्यक्ष ओलीबाट कुनै विशेष उम्मेदवारलाई समर्थन गर्ने निर्देशन वा हस्तक्षेप आएको छैन। ‘प्रधानमन्त्रीबाट कसैको पक्षमा दबाब वा सिफारिस आएको छैन,’ उनले प्रष्ट पारे।

थेबे र पुरी—दुवैको पछि बलियो गुटीय समर्थन

पार्टी स्रोतका अनुसार क्षितिज थेबे अध्यक्ष ओली, महासचिव शंकर पोखरेल, उपमहासचिव पृथ्वीसुब्बा गुरुङ, मोर्चा विभाग प्रमुख भानुभक्त ढकाल तथा पूर्वअध्यक्ष महेश बस्नेत जस्ता नेताहरूको समर्थनमा छन्।

त्यसैगरी पुरीलाई स्थायी कमिटी सदस्य कर्ण थापा, पूर्वअध्यक्ष रमेश पौडेल, बचनबहादुर सिंह र नेता विनोद ढकालजस्ता नेताहरूको समर्थन छ।

दुवै पक्षले शनिबारदेखि नै आफ्नो पक्षमा नाराबाजी सुरु गरेसँगै निर्वाचनको वातावरण तातेको हो।

उम्मेदवारहरूको प्यानल तयार

थेबे पक्षबाट उपाध्यक्षमा महाराजा गुरूङ र विनय शाही, महासचिवमा महेश चौलागाईं, उपमहासचिवमा उपेन्द्र शाही, खुला सचिवमा मदन भण्डारी र देवु बस्नेत, महिला सचिवमा निशा लिम्बू र मधेसी सचिवमा मोबिन आलम उम्मेदवार छन्।

पुरी पक्षबाट भने उपाध्यक्षमा पर्वत भण्डारी र प्रकाश गौतम, महासचिवमा कुवेर अधिकारी, उपमहासचिवमा खेमराज शर्मा, खुला सचिवमा ध्रुव खड्का र अरुण कुँवर, महिला सचिवमा रेशु तामाङ तथा मधेसी सचिवमा चितरञ्जन यादव उम्मेदवार छन्।

४०० बढी उम्मेदवारी, EVM बाट मतदान

१५१ सदस्यीय केन्द्रीय समितिका लागि ४ सयभन्दा बढी उम्मेदवारले मनोनयन दर्ता गराएको संघका इन्चार्ज पहारीले जानकारी दिए। सोमबार साँझ अन्तिम उम्मेदवार सूची सार्वजनिक भएको हो।

निर्वाचन अध्यक्ष मण्डलका अध्यक्ष भानुभक्त ढकालका अनुसार मतदान इलेक्ट्रोनिक भोटिङ मेसिन (EVM) प्रयोग गरेर हुनेछ। सहमति नजुटेपछि निर्वाचन समितिलाई सम्पूर्ण जिम्मेवारी हस्तान्तरण गरिसकिएको उनले बताए।

प्रक्रियागत व्यवस्था पूरा, १,९३९ प्रतिनिधिको सहभागिता

अध्यक्ष मण्डलमा रहेका महेश बस्नेत, राजीव पहारी, किरण पौडेल र निरू बेबीपालले निर्वाचन प्रक्रिया सहज बनाउन भूमिका निर्वाह गरिरहेका छन्। निर्वाचन समितिको संयोजन एमाले निकट प्रगतिशील कानुन व्यवसायी संगठन कास्कीका अध्यक्ष मदनप्रसाद तिवारीले गरिरहेका छन्।

महाधिवेशनमा देशभरका पालिका, जिल्ला, प्रदेश तथा केन्द्रीय तहबाट १,९३९ प्रतिनिधिको सहभागिता रहेको छ।